Пешачењето е еден од наједноставните начини да се грижите за своето здравје. Не ви треба скапа опрема ниту посебен спортски тренинг – доволни се удобни патики и желба да одвоите малку време за себе. Во комбинација со урамнотежена исхрана и здрав начин на живот, оваа активност може да биде значаен сојузник и во слабеењето. Но, колку треба да пешачите за да постигнете забележливи резултати? Одговорот зависи од неколку фактори, како што се темпото, доследноста и вашата почетна физичка состојба.
Колку километри?
Пешачењето е секогаш корисно и здраво, но ако целта ви е слабеење, важно е да одржувате побрзо темпо. Опуштеното одење обично се одвива со брзина од околу 4 до 5 километри на час. Меѓутоа, за дополнително да го поттикнете метаболизмот, се препорачува темпото да го зголемите на околу 6 километри на час, што одговара на речиси 100 чекори во минута.
Како општа насока, може да биде корисно да пешачите со брзина од околу 6 километри на час, најмалку четири пати неделно. Така ќе достигнете околу 24 километри неделно – цел која, во комбинација со правилна исхрана, може да придонесе за губење на вишокот килограми.
Секако, не постои универзално правило. Возраста, нивото на физичка подготвеност и здравствената состојба можат да влијаат врз тоа колку и како треба да пешачите, па затоа најдобро е активноста да ја приспособите на сопствените потреби.
Како да го зголемите согорувањето калории
Ако сакате пешачењето да биде уште поефикасно, можете да внесете неколку мали промени во тренингот. На пример, изберете траса со благи нагорнини, со што ќе го зголемите интензитетот и отпорот. Наизменичното менување на побрзи и побавни делници исто така помага да се стимулира кардиоваскуларниот систем и да се зголеми потрошувачката на енергија.
Друга можност е нордиското одење – дисциплина во која се користат специјални стапови. Покрај тоа што го активира и горниот дел од телото, овозможува подобра распределба на напорот и го намалува оптоварувањето на колената и колковите.
Најдете време за секојдневно пешачење
Можеби ви се чини тешко да вклопите еден час пешачење во и онака исполнетиот ден. Но, всушност, потребни се само неколку едноставни чекори за пешачењето да ви стане навика.
Ако имате можност, паузата за ручек можете да ја искористите за кратка прошетка, а до работа или од работа до дома да одите пеш. Дури и ако го паркирате автомобилот неколку стотини метри подалеку или слезете од јавниот превоз две постојки порано, тоа се едноставни начини да го зголемите бројот на чекори што ги правите во текот на денот.
Прошетката со пријател, член на семејството или кучето може да ја направи активноста уште попријатна. Освен физичките придобивки, пешачењето може да го подобри расположението, да помогне во намалувањето на стресот и да ви овозможи квалитетно поминато време.
Придобивките се многубројни
Слабеењето може да биде една од целите на пешачењето, но не е и единствената. Редовната физичка активност придонесува за подобро кардиоваскуларно здравје, го поттикнува метаболизмот, го подобрува менталното здравје и придонесува за активен начин на живот.
Вистинската разлика, повеќе од интензитетот, лежи во доследноста. Одвојувањето време за прошетка неколкупати неделно е, чекор по чекор, вложување во сопственото здравје.
