Британците навиваат за Вилијам и сакаат токму него да го видат на кралскиот трон, а не принцот Чарлс. Ова произлегува од неодамнешното истражување спроведено од Ипсос на тема кој да ја замени кралицата Елизабета.
Секој четврти Англичанец би сакал Вилијам да биде на тронот наместо Чарлс. Ова е она што произлегува од неодамнешното истражување спроведено од Ипсос на примерок од 2055 возрасни луѓе, а според кое 42% од Британците веруваат дека принцот Чарлс, откако ќе се качи на тронот, треба веднаш да абдицира во корист на првородениот син .
Не станува збор за недоверба кон принцот од Велс: околу половина од испитаниците – 48% – веруваат дека Чарлс би бил добар крал, а само 19% не веруваат дека тој добро би ги извршувал обврските. Неговата популарност се зголеми во последниве години, од оскудни 11% во 2018 година на 43% денес. Сепак, најстариот син – исто така благодарение на неговата сопруга Кејт Мидлтон – е попопуларен и тоа на Чарлс не му оди во прилог.
Гидеон Скинер, шеф на политичките истражувања во Ипсос, ги објаснува податоците на следниов начин:
„Гледајќи кон иднината, околу половина од Британците ја положија својата доверба во принцот Чарлс и точно е дека го гледаат во попозитивно светло од пред четири години. Но, популарноста на принцот Вилијам е многу поголема, веднаш под онаа на кралицата Елизабета. Ова е причината зашто постои хипотезата дека принцот од Велс ќе му го предаде тронот на својот најстар син, а токму оваа хипотеза е многу популарна кај Британците“.
Податоците, исто така, покажуваат дека антимонархиските чувства не се толку развиени како што некои би сакале да бидат: Кралицата останува најпопуларниот владетел кај 69% од испитаниците. Вилијам пак, е веднаш зад неа со поддршка од 64% од испитаниците, надминувајќи ја дури и неговата сопруга Кејт Мидлтон, омилена кај 60% од испитаниците.
