Хрватскиот министер за одбрана Марио Баножиќ се здобил со тешки повреди на главата во сообраќајна несреќа во саботата наутро, во која едно лице загина.
Директорот на Општата болница во Винковац, каде што првично бил згрижен Баножиќ, за ХРТ изјави дека по примарната здравствена помош, министерот ќе биде префрлен во КБЦ Осиек на одделението за интензивна нега.
„Поради потреба од натамошно неврохируршко следење, тој ќе биде префрлен во Клиничката болница во Осиек, на одделението за интензивна нега. Има потреба од неврохируршки надзор. Немаме неврохирургија во општата жупанска болница, па поради повреди на главата од контузија ќе биде префрлен таму поради потреба од дополнителен надзор и опсервација. Инаку, господинот Баножиќ е свесен. Има повреди од контузија на главата и мозокот, но велам дека е во контакт, не изгубил свест“, изјави директорот на болницата во Винковац, пренесуваат хрватските медиуми.
Портпаролот на хрватската влада Марко Милиќ соопшти дека министерот за одбрана има тешки физички повреди, но дека неговиот живот е надвор од животна опасност.
