Сите ќе се согласиме дека екстремот, од една или друга крајност, е најлошата можна опција. Во многу сегменти од живеењето, барем во нашите очи, Кина е екстремна. Ама и ова нашево пак, оди во другата крајност. На Кинеските деца, од технолошки аспект, речиси сè им е забрането, на нашиве – сè им се може.
Иако и до сега имаше ограничување, кога на децата до 18 години, им беше дозволено да играат преку Интернет 90 минути дневно, донесена е одлука ограничувањето да биде зголемено. Овој потег ја одразува долгогодишната загриженост за влијанието на прекумерното играње кај младите. Еден месец пред најновите ограничувања, написот објавен од државниот „Економски информации дневно“ тврдеше дека многу тинејџери станале зависни од игри на интернет и тоа има негативно влијание врз нив. Исто така и еден државен кинески медиум, ги именуваше игрите на Интернет како „духовен опиум“.
Би Би Си го пренесува сопштението на кинеската регулаторна комисија за видео игри, каде се наведува дека на онлајн гејмерите помлади од 18 години ќе им биде дозволено да играат само по еден час во петок, викенд и празници. Исто така, им наложи на компаниите за игри да ги спречат децата да играат надвор од дефинираното време за видео игри: од 20 до 21 часот. Ќе бидат зголемени и инспекциите на компаниите за да се осигура дека временските ограничувања правилно се спроведуваат.
Оваа вест предизвика значителен пад на вредноста на акциите во некои од најголемите кинески фирми за игри на Интернет. Во јули, кинескиот гигант за игри „Тенсент“ објави дека го промовира препознавањето на лицето за да ги спречи децата да играат помеѓу 22:00 и 08:00 часот. Овој потег следуваше по стравувањата дека децата користат лични карти за возрасни за да ги заобиколат правилата.
