Оперската пејачка, сопранот Ана Дурловски за првпат прозборе за својот приватен живот, за трите деца и за сопругот, нејзиниот колега Игор Дурловски.
Првенката на Националната опера и балет, со сопругот гостуваше во емисијата „Нешто конкретно“, а гости беа и Сара Мејс и Димитар Атанасовски и зборуваа на тема деца и семејство. Ана раскажа како им било кога со сопругот живееле во странство и немале помош околу децата.
-Јас сум тип којшто се програмира. Кога знам дека ми следува тежок период, се ставам во таа програма, затоа што знам дека не вреди да си кукам над судбината, колку сум ненаспана.
Тоа веќе однапред се знаеше дека ќе биде тешко. Кај нас беа практично трите деца некако наеднаш, бидејќи втората бременост ми беше со близнаци, две години откако Максим се роди. Така што некако како тројка беа сите.
Ненаспана константно, ама од друга страна, сакав да успеам во двете работи, на приватен и на професионален план. Тогаш и можам да кажам дека некои најголеми успеси што ми се случувале се од тој период.
Инаку, претежно бевме сами. Имавме помош од мајката на Игор или од мојата мајка, но тоа беа ретки моменти затоа што двете беа вработени. Практично бевме оставени сами на себе. Моравме да функционираме заедно, и од тој аспект, сакам да кажам дека навистина добро тој период се помина- рече Ана Дурловски.
