Принцот Филип, кој ја носи титулата војвода од Единбург, роденденот оваа година го прославува само со својата сопруга, кралицата Елизабета II, поради пандемијата на коронавирусот.
Принцот Филип е најстариот сопруг на еден монарх во британската историја. Кралицата која има 94 години го опишува како своја „сила и водилка“.
Филип е познат по силното чувство за должноста, популарноста, но и склоноста кон гафовите. Откако во мај 2017 година објави дека се повлекува од повеќе свои јавни должности, тој присуствуваше само на неколку случувања во друштво на кралицата Елизабета.
Кралицата и Филип имаат четири деца, осум внуци и осум правнуци.
Филип е роден како принц на Грција и Данска на 10 јуни 1921 година, на островот Крф, како син единец на грчкиот принц Ендру и германската принцеза Алиса од Батенберг. Но неговото семејство, кое исто така имало скандинавски и руски претци, било принудено да побегне веќе наредната година, откако била уништена монархијата и неговиот татко едвај избегнал ликвидација.
Филип бил испратен во училиште во Германија и Шкотска, а за време на празниците за него се грижеле разни роднини.
Ова е последната фотографија од кралицата Елизабета и принцот Филип, направена пред само неколку дена пред нивниот дом, Виндзор палатата, каде сопружниците се во изолација поради пандемијата на коронавирусот.
