Претседателот Стево Пендаровски и неговата сопруга Елизабета присуствуваа на интернационалниот фестивал на филмска камера „Браќа Манаки“. Пендаровски на својот фејсбук-профил објави неколку фотографии од манифестацијата. Како и секогаш првата дама на Македонија ги воодушеви присутните со својот беспрекорен моден избор.
„По 43. пат Интернационалниот фестивал на филмска камера International Cinematographers’ Film Festival MANAKI BROTHERS пречекува домашни и странски кинематографери, филмски работници, уметници и автори кои со својата креативност и уметнички дух им го пренесуваат оригиналниот филмски свет на вљубениците во филмот.
Преку годинешната тематска одредница „Реалноста не е доволна!“ фестивалот „Браќа Манаки“ ни нуди две реалности. Првата содржи општоприфатени вистини и факти, а втората, протолкувана низ сензибилитетот на уметноста и диоптријата на камерата, додава нови перспективи во нашите животи, нашите мисли и чувства и во нашите меѓучовечки интеракции во заедницата. Преку двете реалности ни се дава можност да го разбереме светот околу нас и да се разбереме себеси во тој свет.“, напиша Пендаровски.
