Големото финале на музичкото натпреварување „Ѕвездите на Гранд“ се одржа синоќа, а првото место го освои македонскиот пејач Никола Станишиќ. Никола беше кандидат на музичката ѕвезда Светлана Цеца Ражнатовиќ, која постојано го поддржуваше во текот на натпреварот, а синоќа со огромна радост ја прослави неговата победа.
Како и секоја година, победникот на „Ѕвездите на Гранд“ добива вредни награди, а овој пат Никола доби и дополнителна награда.
Водителите Ана Севиќ и Милан Митровиќ минатата недела открија што подготвила продукцијата „Гранд“ за победникот.
– Победникот на „Ѕвездите на Гранд“ се избира преку СМС-пораки од публиката, а како награда добива автомобил Fiat Tipo. Продукцијата „Гранд“ на победникот, покрај статуата, му доделува и ново признание со името Александар Саша Поповиќ – во чест на основачот на продукцијата и креаторот на натпреварувањето „Ѕвездите на Гранд“. Победникот добива и песна со целосна маркетинг-поддршка, а годинава продукцијата ќе награди уште неколку финалисти со снимање на нивните први песни – соопштија тие.
Оваа година првпат е воведена и статуа на победникот која го носи името на Саша Поповиќ, во негова чест.
– Донесовме одлука статуата, која ќе ја однесе победникот или победничката во 2025 година, да го носи името на нашиот пријател, автор и основач на „Гранд“, Саша Поповиќ. Некој од овие млади луѓе од Србија или регионот ќе си замине дома со статуа со неговото име. Тоа е најмалку што можевме да направиме сега кога работиме без него – изјави Воја Неделковиќ за „Гранд“.
