Македонскиот пејач Дарио Панковски беше еден од музичарите кои настапија на концертот во Куманово, кој се одржа во рамките на одбележувањето, 35 години независна Македонија, „Силно светнал ден“. На една објава од вечерта, Дарио сподели дел од својот настап со хитот „Косоока“ и пораката: „35 години ‘Косоока’, 35 години Независна Македонија“, бидејќи годинава одбележува 35 години од своите безвременски хитови „Косоока“ и „Ладна како камен“.
View this post on Instagram
Во неодамнешно интервју за „Слободен печат“ раскажа дека случајно ги пронашол оригиналните, рачно напишани текстови на двете песни во својата богата архива, која ја собира уште од почетокот на кариерата.
„Чувството беше како во рок од една секунда да се вратив во 1991 година, во истото студио со истиот оној мирис на огромна младешка возбуда и еуфорија во создавањето нешто сосема ново“, рече Дарио.
Тој вели дека и по 35 години во себе го препознава истиот човек од времето кога настанале овие песни.
„Јас и денес го гледам потполно истиот Дарио од тогаш, со истите идеали, истата петарпановска енергија, истиот непоправлив ентузијазам, истиот пркос и истиот романтизам… само многу поискусен и нумерички повозрасен за 35 години“, изјави Дарио.
Дарио на музичкиот настан во Куманово се сретнал и со неговиот долгогодишен пријател и колега Игор Џамбазов, со кого сподели заедничка фотографијаа.
„Генерациско дуо. Доообро старо вино, квалитетна берба ’63-та“, напиша Дарио на фотографијата со Џамбазов, алудирајќи на тоа дека и двајцата се родени во 1963 година.
