Наташа Којиќ, која професионално делува меѓу Лос Анџелес и Европа, ја освои златната награда за оригинален саундтрак „Небо“ во категоријата филмска и гејминг-музика на меѓународниот музички натпревар „Ворлд гранд при интернешнл мјузик контест 2026“, со седиште во Лондон.
Нумерата е компонирана и снимена пред само неколку месеци, а инспирирана е од енергијата меѓу двата музички дома на Наташа – Србија и Америка. Песната за првпат беше изведена во живо во МТС Дворана, во скратена верзија, на концертот на нејзиниот татко Драган Којиќ Кеба и веќе се издвојува меѓу нејзините други филмски партитури.
Ова признание дополнително го потврдува нејзиниот статус на меѓународно активна уметница, паралелно со нејзината кариера како кантавторка и изведувачка. Нејзината музика моментално се пласира во американски телевизиски програми и филмови, меѓу кои е и хорор-филмот „Празниот човек“, продукција на студиото „Дваесетти век Фокс“, во музичкиот оддел на композиторот Кристофер Јанг, а има и други проекти во Америка.
Наташа Којиќ моментално работи на анимиран филм, два музички каталога, како и на албум на кој ќе има и песни на мајчиниот јазик.
Курир го контактирал Кеба, кој не го криеше воодушевувањето од успехот на својата ќерка.
„Наградата што Наташа ја освои на Ворлд гранд при интернешнл мјузик контест е потврда за нејзиниот талент, но и за сериозната работа и уметничка зрелост. Особено ме радува што е наградена музика што носи емоција и приказна, бидејќи токму тоа публиката најдлабоко го чувствува. Во тоа се уверив и на мојот неодамнешен солистички концерт, кога во скратена верзија, само со пијано, го навести тоа. Не ми кажа дека воопшто конкурирала, туку ме изненади во еден момент со златниот медал околу вратот“, изјави гордиот татко
