Бугарскиот пејач Азис, чие вистинско име е Васил Тројанов Бојанов, ги израдува своите фанови со вест која брзо ја обиколи јавноста – тој официјално стапи во брак.
Радосната новост Азис ја сподели на Инстаграм, каде објави фотографија од својата рака и раката на партнерот, со јасно видливи венчални прстени.
Со кратката, но симболична порака „Тукушто венчани! Ти благодарам, Америка“, пејачот откри дека венчавката се одржала во Соединетите Американски Држави.
Објавата за кусо време собра илјадници честитки и пораки со поддршка од фанови, колеги и јавни личности, кои му посакаа среќа и љубов во новото животно поглавје.
Азис со години е познат како еден од најконтроверзните, но и најавтентични артисти на балканската сцена. Неговата животна приказна често била тема на медиумите – од фактот дека е роден во женски затвор во Бугарија, додека неговата мајка издржувала казна, до неговата отвореност околу сексуалната ориентација и личниот идентитет.
Во текот на кариерата, пејачот направи и голем пресврт во својот имиџ. Јавно се дистанцираше од екстремната женска сценска појава, го прифати својот машки изглед, а денес е препознатлив по брадата, тетоважите и фитнес-трансформацијата.
Инаку, Азис и претходно бил во брак со маж, уште во 2006 година, иако истополовите бракови сè уште не се легални во Бугарија. По тој период, тој стана татко на ќерка, која ја доби со својата најдобра пријателка, а често истакнува дека со неа има искрен и отворен однос.
