Пејачот Ацо Пејовиќ откри дека има закажани настапи сè до Нова година и призна дека нема причина за жалби кога станува збор за заработката и популарноста.
И додека дел од неговите колеги се жалат дека им е сè потешко да дојдат до свирки, Пејовиќ реди настапи еден по друг. Тој најави дека наскоро ќе направи кратка пауза за да се посвети на семејството, но истакна дека за него работа никогаш не недостига.
– За мене секогаш има работа! Нека се жали кој нема, што да му правам јас – порача пејачот во изјава за медиумите, нагласувајќи дека вечерва ќе настапи последен пат пред заслужениот одмор.
Иако му претстои кратка пауза, Пејовиќ останува посветен на нови проекти. Тој активно работи на снимање свежи песни, а наесен ќе ја промовира и нумерата што му ја подари неговиот кум Филип Живојиновиќ.
