Поминаа повеќе од 100 години откако во текот на Февруарската револуција заврши владеењето на царот Николај Втори Романов. По абдикцијата и домашниот притвор, бил стрелан на 17 јули 1918 година, заедно со семејството и четворицата слуги.
Но приказната за Романови никогаш не престанува да интригира.
Пред две години за првпат беа објавени фотографии на кои се гледа како Николај Втори плива гол.
Фотографиите настанале во текот на неговото патување во Финска во 1912 година, а првпат се прикажани во рамки на проектот #Romanov100.
Во центар на вниманието стигнаа повторно пред неколку дена, кога фотографката и фотоколористка Марина Амарал ги објави на нејзиниот твитер-профил.
Николај Втори и неговото семејство биле големи фанови на фотографијата, поседувале една од најдобрите фотоапарати во тоа време. Тој исто така поседувал специјална камера од „Кодак“ направена ексклузивно за него. Илјадници фотографии го документираат нивниот јавен и приватен живот, нудејќи фасцинантен поглед на руската империја.
Зошто фотографиите од голиот владетел се толку интригантни?
Како што објаснуваат светските историчари и биографите на кралските семејства, всушност, не се работи за голотијатана Николај Втори, туку за „оголеноста“ на еден владетел. Неговата јавна слика требала да биде недопирлива. Тој ја претставува државата и не смее да биде прикажан како немоќен. Во тоа време било незамисливо еден цар, особено на едно толку моќно царство, да се најде во ситуација некој над него да биде надмоќен. Голиот цар пред објективот секако не припаѓа на тој наратив на моќ.
Ретко такви фотографии стигнуваат до очите на јавноста, па токму поради тоа фотографиите на голиот цар Николај Втори предизвикаа толкаво внимание.
