Ѕвездичките со цимет, или таканаречени Зимтстерн (Zimtsterne), се традиционални германски колачиња кои се прават во неколку варијанти – со ореви, бадеми или лешници, со брашно или без брашно. Ние ви предлагаме еден класичен и брз рецепт.
Состојки
2 белки,
150 грама шеќер во прав,
2 лажички цимет,
1 ванилин шеќер,
100 грама мелени лешници,
100 грама мелени бадеми,
50 грама брашно.
Подготовка
На белките додадете им прстофат сол и изматете ги во цврст снег. Постепено додавајте од шеќерот во прав и ванилиниот шеќер, па продолжете да миксирате додека го потрошите целиот шеќер.
Две лажици од смесата од белки одвојте за декорација на ѕвездичките.
Во смесата од белки и шеќер полека додавајте ги мелените лешници и бадеми, циметот и брашното. Со лажица убаво измешајте, па со раце формирајте топка. Подготвеното тесто ставете го на работната површина која претходно сте ја попрскале со шеќер во прав.
Тестото развлечете го на дебелина од 0,5 до 1 см, па со калапи исечете ѕвездички и наредете ги во тава за печење покриена со мрсна хартија. На секоја ѕвездичка ставете малку од смесата од белките што ја сочувавте настрана, и размачкајте ја во форма на ѕвезда. Помогнете си со прстите.
Ѕвездичките печете ги 10-12 минути на температура од 150 степени.
Кога ќе се изладат, може да ги обоите со боја за готвење (достапни во продажба во најразлични нијанси во сите супермаркети).
На крајот врзете им панделка и закачете ги како украси на новогодишната елка.
