Гвакамоле е додаток на јадење, мезе или салата, кое поради специфичниот вкус е популарно насекаде низ светот, а е карактеристично за мексиканската кујна.
Основата на вкусното гвакамоле е авокадото. Се верува дека неговото потекло датира уште од времето на Ацтеките во Мексико.
Денес гвакамоле е дел од секоја модерна мексиканска кујна, но одлично е прифатено и во американската кујна. Новите рецепти вклучуваат и домати, чили или црн пипер, јогурт, босилек и различни дополнителни зачини.
Погрешно е мислењето дека гвакамоле е паста од авокадо, зашто во доброто гвакамоле мора да го почувствувате и лукот, пиперчињата и коријандерот но и парчиња, од мекото авокадо.
Состојки
Половина врзоп млад кромид
Половина врзоп аспарагус
1 лук (истолчен)
1 поголема лута пиперка (ситно исечкана)
5 лажици ситно исечкан коријандер
3 зрели авокада
Сок од 1 лимон
Половина зелен лимон
Сол
Подготовка
Загрејте ја тавата со една лажица маслиново масло на силен оган. Во жешката тава ставете ги младиот кромид ситно исечкан, аспарагусот (исечкан) и половина лимон и печете се додека не добијат смеѓа боја. Оставете да се изладат.
Во меѓувреме излупете ги авокадата и отстранете ги семките, па изгмечете ги. Исечкајте ја лутата пиперка на многу ситни парченца, иситнете го коријандерот, а лукот истолчете го. Додадете ги на изладените кромид и аспарагус. Важно е гвакамоле да има мали парченца од авокадо односно авокадото не смее да биде целото како паста.
Со мешање поврзете ги сите состојки, па зачинете ги со сол и сок од лимон.
Послужете со пченичен чипс.
