Колкупати ви се случило да застанете зад шпоретот и по катастрофата што ја доживувате во кујната, сфаќате дека готвењето не е за вас, па следниот пат се откажувате уште пред да почнете?
Но, не е сè така изгубено. Несвесно правите едноставни грешки што ви ја уништуваат секоја желба за готвење. Прочитајте кои се тие најчестите грешки и следниот пат обидете се да ги избегнете за да имате успешен ден во кујната.
Евтините состојки го уништуваат јадењето
Кој не сака да заштеди пари, но дали купувањето поевтини компири, наместо квалитетни свежи, ќе го смени вкусот на пирето? Секако дека да. Правилото во готвењето е едноставно – какви состојки користите, таков финален производ ќе добиете.
Разликата меѓу успешно и неуспешно зготвено јадење е токму во купувањето соодветни квалитетни состојки. Се разбира, не мора да ги изберете сите најскапи состојки, но кога станува збор за избор на квалитетно и свежо месо, тоа е многу важно. Иако на прв поглед ви се чини дека заштедувате пари со купувањето евтини замени, разликата во пари е, всушност, многу мала. Но, кога на крај ќе ви остане поголема количина од храната и ќе ја фрлите затоа што не ви се допаѓа вкусот, ќе сфатите дека сте направиле поголема штета штедејќи на квалитетот на состојките.
Ги менувате рецептите
Иако имате желба да бидете креативни и да го смените оригиналниот рецепт, некогаш тоа завршува со катастрофа, во зависност од вашите готвачки вештини. Па потоа ќе се жалите дека рецептот не е точен. Кога некој го правел рецептот, имајте предвид дека избрал специфични состојки или вкусови од точно одредена причина. Само затоа што вие повеќе го сакате вкусот на морско оревче од цимет, не значи дека изборот на тој вкус е подобар. И колку и да е точно дека пилешкото бело месо е поздраво од копаните, јадењето може да биде вистинска катастрофа ако го замените видот на месо. Секако ова не значи целосно да се откажете од експериментирање во кујната. Првпат кога готвите некое јадење, одете точно по рецептот, пробајте го јадењето, па размислете што можете следниот пат да смените за да го подобрите јадењето.
Пробувате комплицирани јадења, иако сте почетник
Готвењето е забавно и возбудливо, особено затоа што не мора секојпат да одите во ресторан за да уживате во вкусна храна. А со соодветните алатки и состојки, следното ваше кулинарско мастер дело ќе го зготвите за миг. Освен ако не избравте некое комплицирано јадење кое ќе ви ги уништи плановите за прекрасна вечера.
Пред да експериментирате со такви кулинарски авантури, почнете да готвите поедноставни рецепти. Ако нешто не знаете, побарајте совет од професионален готвач или од некој што е поискусен од вас и применувајте го тоа. Немојте да ги заборавите советите по првиот успешно зготвен оброк, па потоа да се чудите зошто вашето јадење овој пат има чуден вкус.
