Ружа Димова има цветно име (кое сосема го опрадува), во пензија е, и со љубов е посветена на дворот. За жал, сопругот ѝ починал, а децата ѝ заминале во Англија, семејно, па таа сама е посветена на оваа убавина која ѝ ја полни душата.
– Кога пред десет години го средувавме дворот ни помогна една екипа за холтикултурно уредување. Имавме доста чемпреси, но минатата година, за жал, ни се исушија – искрена е Ружа.
Таа се грижи за дворот, вели, тоа и е љубов од мали нозе.
Дворот се простира на 240 квадратни метри и се наоѓа во Штип, каде што живее семејството, поточно во најстарата штипска населба, Баби.
– Штом дојде пролетта си правам сопствен расад на цвеќиња. Цвеќињата јас ги купувам и потоа секоја година си ги размножувам, како на пример, гладиолите и други цвеќиња – ни раскажува Ружа.
Има најразновидни цветни убавици во дворот, но има и собни цвеќиња.
– Многу сакам цвеќе – вели Ружа со насмевка. Секако, таа љубов кон цвеќињата ѝ ја читаме и од нејзините очи.
– Бидејќи имам повеќе слободно време, поголем дел од денот го поминувам во дворот. Ова ме исполнува, но и кога одев на работа уживав во одгледување на цвеќиња. Цвеќето се одгледува со љубов – заклучува Ружа.
Инаку, Ружа е членка на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
Уживајте во фотогалеријата.
Фото – приватна архива
