Кинеските научници велат дека развиле тест за Kовид-19 кој може да ги обработи резултатите исто толку прецизно како и ПЦР тестовите за помалку од четири минути, пренесува „Дојче Веле“.
ПЦР тестовите се најпрецизни на пазарот, но мора да се обработат во лабораторија, што трае со часови, а кога лабораториите се преоптоварени со локални бранови на инфекција, обработката може да трае и со денови.
Брзите, 15-минутни брзи антигенски тестови се помалку сигурни од ПЦР алтернативата.
Истражувачите од Универзитетот Фудан собрале назални примероци од 33 пациенти со позитивнен ПЦР тест за Ковид-19, 23 пациенти со негативен ПЦР тест, шест пациенти позитивни на грип и 25 здрави доброволци. Тестот прецизно ги обработил сите случаи без грешка за помалку од четири минути, според рецензирано истражување објавено во понеделникот во списанието „Nature Biomedical Engineering“.
ПЦР тестовите се попрецизни од антигенските тестови бидејќи се почувствителни. Антигенските тестови бараат поголема концентрација на вирусот од ПЦР тестовите за да покажат позитивен резултат. Ова значи дека антигенските тестови имаат поголема веројатност да покажат лажно негативен резултат.
Антигенските тестови бараат делови од протеини инфицирани со вирус, додека ПРЦ тестовите бараат вирусен генетски материјал како нуклеинските киселини и РНК.
Тестот развиен на Универзитетот Фудан користи пречувствителен електромеханички биосензор за откривање на нуклеински киселини кои претходно тешко се идентификуваа поради нивната ниска концентрација во примероците за тестирање.
Истражувачите рекоа дека развојот на преносливи тестови со таква технологија може да овозможи тестирање на лице место на аеродроми, клиники, одделенија за итни случаи и дома. Тие додадоа дека може да се користи и за брза дијагноза на други видови болести.
