Вчера започна 75. Кански филмски фестивал со поглед на руската војна во Украина. Украинскиот претседател Володимир Зеленски со говор во живо на видео ја покани новата генерација режисери да се спротивстават на диктаторите навраќајќи се на Чарли Чаплин кој го сатиризираше Адолф Хитлер. Зеленски доби бурни овации и долго зборуваше за врската помеѓу киното и реалноста. Тој ги наведе филмовите како „Апокалипса сега“ на Френсис Форд Копола и „Големиот диктатор“ на Чарли Чаплин кои не се разликуваат од сегашните околности во Украина.
Зеленски го цитираше говорот на Чаплин за „Големиот диктатор“, објавен на почетокот на Втората светска војна: „Омразата на луѓето ќе помине, диктаторите ќе умрат и моќта што ја одзедоа од народот ќе му се врати на народот“.
„Потребен ни е нов Чаплин кој докажува дека киното на нашето време не молчи“, се изјасни Зеленски. Украинскиот претседател ги повика режисерите да не „молчат“ додека стотици луѓе продолжуваат да умираат во Украина и да покажат дека киното „секогаш е на страната на слободата“.
Војната ќе биде редовно присутна во Кан, каде оваа година фестивалот им забрани на Русите поврзани со владата да присуствуваат. Ќе бидат прикажани неколку филмови на истакнати украински режисери, меѓу кои и документарниот филм на Сергеј Лозница „Природната историја на уништувањето“. Снимката што ја сними литванскиот режисер Мантас Кведаровичиус пред да биде убиен во Мариупол во април ќе ја прикаже неговата девојка Хана Билоброва. „Final Cut“, најновиот филм на режисерот на „The Artist“ Мишел Хазанавичиус, исто така беше преименуван од оригиналниот наслов „Z“, откако украинските демонстранти забележаа дека буквата Z за некои симболизира поддршка за војната на Русија во Украина
Вчера беше добар ден за украинскиот претседател, не само поради овациите во Кан, туку и поради тоа што Емануел Макрон потврди дека апликацијата на Украина за членство во ЕУ ќе биде разгледана на состанокот на Европскиот совет веќе во јуни. Самиот француски претседател, пред само неколку недели, тврдеше дека ќе бидат потребни децении за Украина да биде прифатена во ЕУ. Макрон, исто така, го увери Зеленски дека снабдувањето на Франција со воена и хуманитарна помош за Украина ќе продолжи и ќе се зголеми во наредните недели.
