Изненадувачки, кралицата Елизабета Втора го отвори платинестиот јубилеен концерт појавувајќи се на видео со Мечката Падингтон, саканиот лик од англиската литература за деца создаден од Мајкл Бонд.
Клипот беше направен пред неколку месеци од Би-Би-Си и беше емитуван на изненадување вчеравечер, како дел од прославата за 70-годишното владеење на кралицата.
Во секвенцата, Падингтон го нуди својот препознатлив сендвич со џем, но кралицата одбива, велејќи дека има веќе подготвен во нејзината црна чанта, за секој случај.
Набргу потоа, батлер ја известува кралицата дека се е подготвено надвор за прославата на платинестиот јубилеј, додека толпата надвор експлодира во славење. „Среќен јубилеј госпоѓо. И благодариме. За сè”, вели Мечката Падингтон. Нејзиното височество одговара со насмевка: „Многу сте љубезни“.
Потоа, двајцата чукаат на порцеланот во ритамот на извиците на публиката, користејќи ги сребрените лажички за чај. Во позадина се слуша ритамот на песната на Квин „We Will Rock You“, која го отвори јубилејниот концерт пред Бакингемската палата.
И тогаш навистина започнува концертот во чест на кралицата. На настанот присуствуваа 22.000 луѓе, додека други, милиони луѓе, останаа пред телевизорите за да го следат директниот пренос на Би-би-си. Меѓу другите настапија Род Стјуарт, Дијана Рос, Андреа Бочели, Ханс Цимер, Џорџ Езра и Сем Рајдер.
