Генералниот секретар на НАТО Јенс Столтенберг најави во Вашингтон дека „во следните неколку дена“ ќе свика состанок со лидерите на Шведска, Финска и Турција за да се обиде да го надмине противењето на Анкара за влезот на двете нордиски земји во Алијансата.
„Ние сме во близок контакт со Турција, важен сојузник на НАТО, и со двете земји кои ја поднесоа својата кандидатура за влез во НАТО, Финска и Шведска“, рече тој.
Во меѓувреме, турскиот претседател продолжува да го оспорува влезот на Шведска и Финска во Атлантската алијанса.
„НАТО е безбедносна организација, а не организација која поддржува терористички организации“. Ова го изјави вчера турскиот претседател Реџеп Таип Ердоган на состанокот на парламентарната група на неговата партија АКП.
Ердоган го оспори влезот на Шведска и Финска во Атлантската алијанса, обвинувајќи ги двете скандинавски земји за поддршка на Курдистанската работничка партија (ПКК), која Анкара ја смета за терористичка група.
