Советниците на Бајден не го гледаат Трамп како сериозен конкурент на претстојните избори, пренесува Ројтерс.
Одлуката на поранешниот американски претседател Доналд Трамп формално да се кандидира за претседател на изборите во 2024 година предизвикала позитивни оценки кај тимот на актуелниот шеф на Белата куќа Џо Бајден, пренесува Ројтерс повикувајќи се на извори. Според агенцијата, советниците на американскиот претседател не го гледаат Трамп како сериозен конкурент и сметаат дека учеството на политичарот во изборната трка може да обезбеди реизбор на актуелниот американски претседател.
Како што е наведено, тимот на Бајден го гледа Трамп како ранлив и поразен кандидат кој само придонесува за излезноста на демократските гласачи на изборите.
„Трамп е убедливо најслабиот од кандидатите“, вели еден од изворите на Ројтерс.
Во исто време, некои советници на актуелниот американски претседател сметаат дека Трамп сепак не треба да се потцени, бидејќи експертите постојано залудно го отпишуваат. Ројтерс нагласува дека тимот на Бајден во моментов активно се подготвува да ја започне неговата кампања, која се очекува да биде подготвена на почетокот на 2023 година, а целосно да започне на пролет.
