– Денес времето во Македонија ќе биде променливо облачно со слаб до умерен ветер од променлив правец. Попладне и кон крајот на денот ќе има локални врнежи од дожд и снег на пониските, и само снег на повисоките места и на планините. Во текот на ноќта врнежите ќе се прошират на повеќе места и поинтензивни ќе бидат во јужните предели. Температурите ќе се искачуваат во интервалот од 3 до 12 степени. Во Скопје и околината времето ќе биде променливо облачно со слаб до умерен ветер од променлив правец. Кон крајот на денот и во текот на ноќта ќе има услови за повремени врнежи од дожд и снег. Максималната температура ќе се искачи до околу 10 степени – вели нашиот метео прогнозер Славчо Попоски.
Според Попоски, за време на викендот, како и во првите денови од следната недела времето ќе биде претежно облачно и СТУДЕНО со повремени врнежи од дожд и снег на пониските, и само снег на повисоките места и на планините. Повремено и локално врнежите ќе бидат ПОИНТЕНЗИВНИ и ќе преминуваат само во снег и на некои пониски места.
– Исто така во следниот период снежната покривка на повисоките и планинските места позначително ќе се зголеми, а нова ќе се формира и на некои пониски места и тоа особено во западните и во југозападните предели. Што се однесува до температурите, минималните ќе се спуштаат во интервалот од -4 до 3 степени, додека максималните ќе бележат тенденција на значителен пад и во следните неколку денови ќе се искачуваат во интервалот само од 0 до 7 степени и истите ќе бидат под просекот за овој период од годината – заклучува Попоски.
