Рускиот олигарх Роман Абрамович и најмалку двајца украински преговарачи почувствувале симптоми на сомнително труење по состанокот во Киев на почетокот од овој месец.
Весникот „Волстрит џурнал“ ја пренесува веста, повикувајќи се на некои извори, според кои сомнителниот напад можеби го извршиле некои во Москва кои сакале да ги саботираат разговорите за ставање крај на војната. Извор близок пак, до Абрамович рекол дека не е јасно кој ја таргетирал групата.
Симптомите забележани по состанокот во Киев на почетокот на овој месец вклучувале „црвени очи, лупење на кожата на лицето и рацете“. Оттогаш, пишува Вол Стрит Џурнал, нивното здравје е подобрено и се далеку од опасност.
Западните експерти кои го истражуваат инцидентот веруваат дека е тешко да се утврди дали симптомите биле предизвикани од хемиски или биолошки агенс и дали станува збор за напад со електромагнетно зрачење.
Портпаролот на Абрамович го потврди сомневањето за труење на рускиот олигарх на почетокот на март за време на еден од првите преговарачки состаноци меѓу делегациите на Москва и Киев за ставање крај на војната во Украина. Ова беше објавено од Би-Би-Си и од други медиуми во Обединетото Кралство, каде Абрамович – кој исто така има израелско државјанство и кој моментално е погоден од британските и санкциите на ЕУ, но не и од САД – бил долгогодишен жител, како покровител на фудбалскиот тим Челзи.
Украинскиот советник на претседателот и главен преговарач, Михаило Подољак, ги негира наводите за труење на украинските преговарачи од страна на Русите. Ова се „шпекулации“, рече Подољак, додавајќи дека сите украински преговарачи „работат како и вообичаено“.
