Започнавме убава соработка со една врвна готвачка која секое јадење го претвара во магија од вкусови – Теодора Георгиевска.
Оваа извонредна мајсторка и една од највлијателните готвачки на социјалните мрежи кај нас, стои зад бројните рецепти кои ги објавува на профилот „Готвиме со Теа“ – „gotvime.so.tea“.
Денес нашата драга Теа со сите вас споделува превкусен рецепт за полнети пиперки.
– Обожавам полнети црвени пиперки! Слободно можам да кажам дека е едно од моите омилени традиционални готвени јадења кои често се дел од моето мени за ручек, вели Теа и додава – Секогаш кога правиме ајвар си замрзнувам одредена количина црвени пиперки за да си го подготвувам овој омилен ручек за време на зимскиот период.
Потребни состојки: (8 пиперки)
8 средни црвени пиперки400 гр. мелено месо100 гр. ориз1 главица кромид100 мл. сос од домати или два свежи домати1 компирмагдоноссол и бибермешан сув зачин1 лажичка црвен пипермаслоНачин на подготовка:
Во тавче ставете масло да се загрева. Кромидот ситно исецкајте го и ставете го да се пржи во загреното масло. Пржете 2-3 минути и потоа додадете го месото. Додека го пржите месото со лажица убаво иситнете го, додадете го доматите, пржете уште некоја минута и на крај додадете го оризот. Посолете и зачинете по желба, додадете црвен пипер и ситно сецкан магдонос, убаво измешајте и тргнете го тавчето од оган.
Во тавче за печење обложено со мрсна хартија наредете ги пиперките и со лажичка распоредете ја смесата во сите пиперки подеднакво. Затворете ги пиперките со тенки кругчиња компир. Во тавчето во кое се пржеше месото ставете 2 чаши вода и малку сол и мешан сув зачин. Загрејте ја водата и истурете ја врз пиперките. Завиткајте го тавчето со алуминиумска фолија и ставете го во загреана рерна на 250 степени 30 минути. Потоа извадете ја фолијата и вратете го тавчето уште 10-15 минути за да се запечат одозгора.
На здравје!
