Започнавме убава соработка со една врвна готвачка која секое јадење го претвара во магија од вкусови – Теодора Георгиевска.
Оваа извонредна мајсторка и една од највлијателните готвачки на социјалните мрежи кај нас, стои зад бројните рецепти кои ги објавува на профилот „Готвиме со Теа“ – „gotvime.so.tea“.
Денес нашата драга Теа ни подготви ќофтиња полнети со моцарела, обвиткани со кромид и сланина.
– Покрај тоа што се многу вкусни, тие се и декоративни. Кога ги печам секогаш практикувам да ги завиткам во алуминиумска фолија, бидејќи така ја задржуваат сочноста, а хартијата за печење со која го обложувам тавчето ми помага да не го рибам тавчето после печење – вели Теа.
Потребни состојки:
400 гр. мелено месо3 главици кромид150 гр. сланина100 гр. моцарела3 лажици лебни трошки1 јајцемешан сув зачинбуковецсол и бибермасло
Начин на подготовка:
Кромидот исчистете го, пресечете ги на пола и од секој одвојте ги првите два слоја. Останатите исецкајте ги ситно.
Во длабок сад измешајте ги меленото месо, јајцето, лебните трошки, зачините и исецканиот кромид. Убаво измешајте со рака и од оваа смеса формирајте 6 топчиња. Во средината на топчињата ставете моцарела и обвиткајте ги со кромид и парчиња сланина. Замотајте ги во алуминиумска фолија и наредете ги во тавче за печење обложено со мрсна хартија за печење.
Печете ги во загреана рерна на 250 степени 20 минути, а потоа извадете ги од фолијата и печете ги уште 10 минути за да се запечат.
На здравје и уживајте!
