Руското Министерство за надворешни работи соопшти дека посетата на претседателката на Претставничкиот дом на САД Ненси Пелоси ја сметаат за провокација. Ова се наведува во соопштението од министерството.
„На 2 август Пелоси пристигна во Тајван. Нејзината посета ја сметаме за јасна провокација во духот на американската агресивна линија“ , се вели во соопштението, пренесува газета.ру.
Министерството нагласи дека ги смета односите меѓу Кина и Тајван „чисто внатрешна работа на Кина“, која, пак, има право да преземе мерки за заштита на својот суверенитет и територијален интегритет.
„Го повикуваме Вашингтон да се воздржи од дејствија кои ја поткопуваат регионалната стабилност и меѓународната безбедност и да ја препознае новата геополитичка реалност, во која веќе нема простор за американска хегемонија“, истакнаа од руското Министерство за надворешни работи.
Претходно, членот на Меѓународниот комитет на Советот на федерацијата, Сергеј Цеков, изрази уверување дека посетата на претседателката на Претставничкиот дом на американскиот Конгрес Ненси Пелоси на Тајван ќе предизвика ескалација на конфликтот меѓу Кина и САД, пренесува газета.ру.
Пред ова, координаторот за стратешки комуникации во Советот за национална безбедност на Белата куќа, Џон Кирби, изјави дека Вашингтон не гледа причина за развој на тензии со Кина во позадината на доаѓањето на Ненси Пелоси во Тајван.
