Сателитските снимки покажуваат драстичен пад на нивото на загаденоста над Кина, кое е барем делумно предизвикано со намалувањето на активностите поради коронавирусот, објави американската вселенска агенција НАСА.
Мапите на НАСА покажуваат колку нивото на азот диоксидот (NO2) е помало оваа година во споредба со истиот период лани.
Намалувањето на загадувањето се поклопува со рекордното намалување на активностите на фабриките во Кина бидејќи производителите ги забранија активностите за да се спречи ширењето на вирусот.
Научниците на НАСА велат дека намалувањето на нивото на азот диоксид што го предизвикуваат моторните возила и фабриките, прво е забележено во Вухан, а потоа се проширило и во остатокот од земјата.
НАСА забележува дека намалувањето на загаденоста на воздухот коинцидира со рестрикциите воведени за транспорт и затворањето на погоните, бидејќи повеќе милиони луѓе се испратени во карантин.
