Принцот Хари ќе се појави на крунисувањето на Чарлс Трети без Меган Маркл. Ова го пренесува Дејли Мејл повикувајќи се на Бакингемската палата.
Бакингемската палата потврди дека војводата од Сасекс ќе присуствува на службата за крунисувањето на кралот Чарлс Трети во Вестминстерската опатија на 6-ти мај. Војвотката од Сасекс ќе остане во Калифорнија со принцот Арчи и принцезата Лилибет“, се вели во соопштението.
Забележано е дека принцот Хари ќе пристигне сам од САД во Велика Британија, а Меган Маркл ќе ја пропушти церемонијата. На крунисувањето нема да се појават ниту децата на војводата и војвотката од Сасекс.
„Меган Маркл ќе го пропушти крунисувањето на Чарлс Трети на 6 мај поради роденденот на нејзиниот син Арчи Харисон“, објасни пријател и биограф на војводите од Сасекс, Омид Скоби за англискиот весник The Sun.
Тој додаде дека принцот Хари, најверојатно, нема да остане долго време во Велика Британија.
„Очекувам дека ќе биде многу брзо патување за принцот Хари во Велика Британија и тој ќе присуствува само на церемонијата во Вестминстерската опатија“, објасни Омид Скоби.
Потсетуваме дека на настанот ќе учествуваат и петте внуци на Камила, петнаесетгодишните Лола и Елиза, како и тринаесетгодишните Фреди, Луис и Гас.
