Македонската пејачка Тамара Тодевска и Лука Радовиќ за првпат заедно ја добија честа да бидат кумови на свадба, а судејќи по фотографиите, двајцата одлично се забавувале на прославата.
Лука на социјалните мрежи сподели албум со фотографии од свадбата, откривајќи дел од атмосферата, но и нивните елегантни модни изданија.
„Кум и кума по првпат!“, напиша тој покрај фотографиите.
За свечената пригода, Тамара избра долг сатенски фустан во нежна розово-виолетова нијанса, со висок околувратник и крој што ја следи линијата на телото. Косата ја носеше собрана во елегантна пунџа, а изгледот го надополни со впечатливи обетки.
Лука, пак, се одлучи за класичен црн смокинг, кој го искомбинира со бела кошула и пеперутка-вратоврска.
Во меѓувреме, Тамара се подготвува за својот голем концерт, кој е закажан за 7 декември во арената „Борис Трајковски“ во Скопје.
