Разговараме со Менка Чичоска, дама со широка насмевка и огромна љубов кон природата, а која исто толку љубов вложува и во работата што ја работи – туризмот.
Летото е пред нас, и Менка има полни раце работа, но има и големо искуство во туристичката дејност, зашто 20 години работела во врвни хотели. Денес пак, се занимава со домашен туризам, а живее на едно од најатрактивните места покрај Охриското Езеро, Пештани.
А бидејќи сега е повеќе дома, таа има и повеќе време да се посвети на нејзината градина која изобилува со најразновидни цвеќиња.
– Со нега на цвеќе се занимавам цели 30 години. Додека бев кај мајка ми, учевме и работевме земјоделие. Откако дојдов тука почнав да се занимавам со цвеќе – ни открива Менка.
Најпрво многу ја сакала лазечката сардела, и сите балкони и тераси ѝ биле полни со сардели во сите бои и нијанси. А, потоа, година по година, почнала и на поголемо да купува и одгледува цвеќе.
– Цвеќето ме исполнува, го сакам секое цвеќе многу – вели Менка.
За одгледување и уредување на домот и дворот најмногу е посветена таа, додека нејзиниот сопруг има други обврски.
Инаку, дворот не е воопшто мал, се простира на 150 квадратни метри и секое цвеќе, како што вели Менка, веќе си го има зафатено своето место.
– Имаме рози во најразлични бои, леандри, хортензии и повеќе видови на сезонско цвеќе – раскажува со радост Менка, набројувајќи – бегонии, питунии, камелии, обетки и ред други.
Но, тоа не е се. Добар дел од времето таа го минува и во одгледување на африкански лубеници.
– Хибридни, ги размножувам од лист, па ги имам некаде преку стотина во моментов, треба да цветаат а некои се усте растат.
Се согласува дека два до три часа дневно е доволно време за да им се посветите на цвеќињата, на одгледување, полевање, прихрана.
– Бугенвилија, леандри, сардели, сурфинии се повеќе за на сонце, но кај мене дворот е на северна страна и така ми се поуспешни, побогати со цвет, со еден збор прекрасни – низ насмевка ни покажува.
Што се однесува до предизвикците во дворот, вели дека најголем предизвик е кога доаѓа пролет, „веднаш почнувам со идеи за цвеќе, па резење, уредување на дворот, за да ми е убаво средено и сакам да узивам во секое цветче – ни открива нашата цветна дама.
И за крај порачува „сакајте го цвеќето, посветете му време и тоа ќе ви возврати со убавина. Најмногу љубов и волја пред се е потребна за сите оние што сакаат да негуваат цвеќе!“.
Инаку, Менка е членка на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
Уживајте во фотогалеријата од прекрасниот двор на Менка во прекрасното Пештани.
Фото – приватна архива
