Разговараме со Роберт Ѓоргиев, кој не е само љубител на цвеќиња и природа воопшто, туку тој е и креативец, уметник и занаетчија.
– Уште од мал ги сакав цвеќињата, а од рани години почнав да создавам украсни елементи од корени од дрва, мини фонтани од камења – ја започнува Роберт својата приказна.
Завршил средно градежно и се вработил во приватна градежна фирма каде што се стекнал со огромно работно искуство сè до 2011 година, а потоа почнал приватно да работи, и тоа го прави и денес.
– За да создадеш градина со сите елементи, не е потребно само знаење, најважното е да ја сакаш работата, да имаш љубов кон работата – вели Роберт. – Постојат правила и принципи на изработката, според местоположбата и според условите, за на сонце треба да се внимава каква трева ќе се посади, кои видови на цвеќе, така е исто и за на сенка… – ни објаснува Роберт.
Што се однесува до начинот на аранжирање, тој продолжува:
– Постојат повеќе начини на аранжирасња, едниот начин е разновидните цвеќиња правилно да се распоредат, вториот начин е да создадете уметничка глетка, слика со помош на дробен варовник и дрвен декор, декоративен мулц. Мојот двор е изработен со природен матријал, камен и трева, со помалку цвеќиња, но со повеќе овошни садници.
Дорот се наоѓа во преубавото село Смоларе, во областа Подгорје, во близина на Струмица кадешто Роберт живее и се разбира, твори.
– Градинарството е уметност. За да имаш трајно убава градина прво мораш да го сакаш тоа, редовно да се грижиш за неа, со наводнување, косење трева, резење… Цвеќето мора да се негува, а ако не го правите тоа, подобро немојте ни да го садите – заклучува големиот љубител на цвеќе, нашиот соговорник.
Не само аранжирања на дворови, туку овој махер изработува и фурни и фонтани. Секако, не се сомневате, нели, дека неговиот двор е среден од „глава до пети“ и изгледа вонсериски. Но тој така ги средува и другите дворови, па доколку ви недостига време, идеја, занаетчиство, тука се креативните и вешти раце на Роберт.
Инаку, Роберт е член на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
Уживајте во фотогалеријата од прекрасниот двор на Роберт во село Смоларе, и од некои од дворовите кои ги „дотерал“ до совршенство.
Во продолжение дела кои ги изработил Роберт.
Фото – приватна архива
(Фото сторија) Двор за паметење во Демир Хисар, Габриела ни ги откри тајните на убавината
