„Во ова невино време што измина, во животот ми влезе личност која ми го облагороди моето време. Некако си се надополнивме, си знаев дека тоа е тоа уште на почетоците кога започнуваше нашата врска… љубовта не е нешто егзактно што можеш да го пресметаш. Едноставно тоа го чувствуваш во себе. Не за џабе велат дека пеперутките во стомакот, не лажат. Кога ќе го почувствувате тоа, ќе знаете дека станува збор за она вистинското и дека таа е личноста со која сакате да ја испишете една од најубавите приказни во животот“, истакна синот на нашиот поранешен претседател, Ѓорге Иванов, Иван Иванов во интервју за емисијата „Бекстејџ“ откривајќи дека ја пронашол својата сродна душа .
Името на неговата вереница е Јана, а како што истакна неговата идна сопруга го освоила со шармот, насмевката, нивото на промислување на работите околу себе, со нејзината интелигенција и убавина нормално.
Иван откри и дека кога ќе заврши пандемијата, планираат и голема традиционална свадба.
„Јас сум растен во такво семејство, сум растел со нана, баба, дедо што едноставно ми го всадиле тоа. јас сум горд на нашата традиција и не сакам ниту да размислувам дека некој би се срамел од тоа и дека не сака да испочитува нешто што било обред и адет кај нашите стари кои си го почитувале и зачувувале тоа пренесувајќи го од колено на колено“, истакна во интервјуто Иван, додавајќи дека покрај традиционалниот дел секако ќе имаат и модерен сегмент.
Вчеравечер на својот фејсбук – профил Иван Иванов сподели и фотографија од својата партнерка, а во описот на фотографијата напиша.
– Од сега па за навек. Јана, стои во описот на фотографијата на која неговата избраничка прави „селфи“ во автомобил. Иван ја надополни објавата со емотикон срце.
Иван иако примарно е политколог, тој е вљубеник во музиката и инспиративен поет кој неодамна ја промовираше својата збирка поезија „Невино време“. На промоцијата присуствуваа неговите родители, нашиот поранешен претседател Ѓорге Иванов, неговата мајка, поранешната прва дама Маја Иванова, неговата девојка Јана како и бројни истакнати личности од јавниот живот, роднини и пријатели на семејството Иванови.
