Финалето на Евровизија 2024 се одржува вечерва во Малме, Шведска, а главен фаворит е хрватскиот претставник Бејби Лазања со песната „Rim Tim Tagi Dim“.
Бејби Лазања за многу кратко време ги освои срцата на публиката, па на обложувалниците сè уште е на првото место, додека на второто место во моментот е претставничката на Израел, Еден Голан.
Бејби Лазања, кој оваа година ја претставува Хрватска, со недели важи за фаворит на обложувалниците, а неговата популарност порасна по експлозивниот настап на првата полуфинална вечер.
На социјалните мрежи се појавија и критики за претставникот од Хрватска, а се однесуваат на знаковниот поздрав што го испрати во текот на настапот. Многу корисници на социјалните мрежи го обвинија за „сатанизам“ и тврдат дека во неговиот поздрав гледаат симбол на ѓаволот.
Во текот на првата полуфинална вечер, Бејби Лазања ја крена раката со испружени показалец, малиот прст и палецот.
Меѓутоа, овој поздрав беше погрешно протолкуван и критикуван од корисниците на социјалните мрежи. Станува збор за голема заблуда.
Знакот кој Бејби Лазања го покажа на меѓународниот знаковен јазик претставува љубов, нешто позитивно и добро. Трите испружени прсти ги претставуваат буквите I, L и Y, почетните букви од фразата „Те сакам“ (I love you).
Да покажеше испружен показалец и малиот прст, а со палецот да ги држеше свиткани средниот и домалиот прст, значењето на изразот ќе беше поинакво. Тоа би значело дека покажува рогови, објаснила Ружица Вишњиќ, претседателка на Здружението на лица со оштетен слух од Винковци за порталот vinkulja.hr.
