Денес разговараме со Васка и Љупчо Димитровски кои живеат во Охајо, САД и топло ве поздравуваат оттаму.
Пред да се преслат во САД, пет години биле во Англија на Newbolld college, а потоа, во 1999 година стигнале во Колумбус, главниот град на американската држава Охајо. Васка е од Кавадарци, а нејзиниот сопруг од Скопје. Таа по професија е козметичарка, а тој е музичар.
Откако се запознавме со овие прекрасни Македонци, преминавме на главната тема, градината, дворчето и се разбира, на убавината – цвеќето.
– Цвеќињата се наша релаксација, уживаме во дворчето во слободно време, а што се однесува до негата повеќе за тоа е задолжен мојот сопруг, ни раскажува Васка и додава дека еден час дневно задолжително им посветуваат на своите убавици, но тоа го прават со уживање и со големо задоволство.
Претходно живееле во апартман, а сега, веќе 15 години се во куќата, и оттогаш почнале и да ја негуваат својата љубов кон цвеќињата.
– Прво почнавме со сезонски цвеќиња, ни раскажува Васка и вели дека омилени ѝ се кактусите со своите прекрасни цветови. А тие за да цветаат со сиот свој раскош, потребна им е добра земја и потхранување со посебни минерали кои ги купуваат во цвеќарница.
– За да се одгледува било кој кактус или друго цвеќе, во секоја саксија, тука, има и упатство за тоа што е потребно и кои услови ги бара цвеќето за да напредува. Без тоа упатство цвеќето не може да биде негувано на вистински начин и брзо може да свене, искрена е нашата соговорничка.
Ја прашуваме госпоѓа Васка за совет – што би им порачала на оние кои допрва сакаат да почнат со нега и одгледување на цвеќе и растенија, а таа ни одговара:
– Мој совет е без упатство да не купуваат било-какво цвеќе, затоа што секое си има посебни барања, услови и нега. Второ, потребно е тоа да се негува со задоволство и со љубов за да му се даде сè што му е неопходно навреме, од вода до минерали, и количински точно колку што е потребно. Може да се почне со било кое цвеќе, со упатство за оджрување, одгледување или негување, едноставно речено, зашто без тоа не можете да му угодите на цвеќето и од него за возврат да го добиете тоа што цвеќето може да ви го даде.
Браво за овие Македонци, кои и покрај бројните обврски, најдоа време за разговор со нас, докажувајќи дека без разлика на далечината, љубовта останува да нè поврзува со родната грутка.
Инаку, Васка е членка на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
УЖИВАЈТЕ ВО ФОТОГАЛЕРИЈАТА.
ФОТО – ПРИВАТНА АРХИВА
ФИЛИП ДИМКОСКИ, ГРАДИНАР: Само среќни растенија и среќни животни ќе нè направат среќни и сити
