– Мириса неверојатно и највкусно!, вели Бети Пешовска, фармацевтка по професија, но домаќинка ипол во кујна. Бети е членка на Фејсбук групата Здрава Храна МК верзија и речиси секојдневно нè радува со инспиративни специјалитети.
– Oваа сочна превкуснотија се вика „Бабка” и претставува еврејско пециво слично на бриош, често исполнето со чоколадо или цимет.Јас додадов и лешници, малку чоколаден крем и добив нешто што не смеете да го пропуштите, објанува фармацевтката.
Еве го рецептот
За Тесто:
= 250 мл• 3 чаши брашно
• 170 мл топло млеко
• ½ чаша путер на собна температура
• 3 лажици шеќер
• 1 сув квасец (10 гр)
• ½ мала лажичка цимет
• прстофат сол
За фил:
• 150 гр црно чоколадо
• 2 лажици путер
• 2 лажици чоко-лешник крем
• 50 гр сецкани лешници
Подготовка:
Чоколадото со путерот го топите на пареа и откако ќе се олади го додавате чоколадниот крем и промешувате.
За тестото е потребно во подлабок сад да ги измешате сите состојки и да го замесите. Откако ќе добиете фино тесто, го оставате на топло да стаса 1 час. Откако тестото ќе стаса, на набрашнета површина го расукувате во правоаголна форма и на него го нанесувате филот по целата површина (оставате по 1 прст од сите страни за да не истече при виткање). Попрскувате со сецканите лешници. Тестото го виткате како ролат и го пресекувате по должина со што ќе добиете 2 ленти. Нив извртувајте ги една со друга, со кремот свртен нагоре. Исто како да правите плетенка, но од 2 дела.
Во намрсен долгнавест плех го префрлате вака изработеното тесто и го оставате да стаса повторно, но овој пат е доволно само половина час.
Потоа колачот го печете на 170° Ц, 30-40 минути, додека тестото добие бакарна боја.
Добар апетит!
