Денес уживаме во населбата Ченто во дворот на жената со златни раце, Цеца Стојчевска.
Стојчевска е вработена во Военото воздухопловство, но и покрај тоа што има куп работа, секогаш посветува доволно време на нејзиното цветно царство, но и на – внимавајте – изработка на прекрасни декорации!
– Години наназад цвеќињата ми се голема љубов, тие ме опуштаат и уживам во нивното одгледување, вака ја започнува својата цветна приказна нашата Цеца.
Дворчето не е премногу големо, ама е прекрасно! А нашата домаќинка сама е одговорна за неговата нега, за садење и сè што е околу грижата на цвеќињата.
– Сакам секакво цвеќе. Не можам некое посебно да одделам како омилено, имам петунии, рози, бонбончиња, вербена, сребрен водопад, лаванда, сардели, сукуленти, и да не набројувам…има од се по нешто, ни рече Цеца.
Оваа вредна жена секојдневно им посветува најмалку по еден час на своите убавици, но за време на викендите – повеќе, и до три часа.
– Има што да се работи. Зимно време некои од цвеќињата ги внесувам внатре, некои остануваат надвор, оние што не мрзнат, – вели Цеца и додава – некои пак, секоја година ги садам бидејќи се едногодишни.
Следува совет за оние кои сакаат допрва да почнат да се занимаваат со нега на цвеќе.
– Мојот совет за почетници би бил да почнат со поедноставни цвеќиња, како бонбончиња, благодарни и незахтевни за одгледување, ни вели жената со златни раце.
Ни објаснува дека нема посебна филозофија во одгледување на цвеќиња, а основна и главна компонента е љубовта. Односно, ако имате љубов за растенијата и ѝм ја давате, тие знаат да возвратат и да ве израдуваат. Потоа, доаѓаат негата, дохраната, наводнувањето и се друго.
Рецептот е едноставен – љубов!
Инаку, Цеца е членка на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
Уживајте во фотогалеријата.
ФОТО ПРИВАТНА АРХИВА
