Фотографија од Марија Брзакова од струмичкото село Босилово вчера, 20 дена по нејзиното исчезнување, се најде на листата на исчезнати лица на веб страницата на Министерството за внатрешни работи.
Како што веќе пишуваше „Слободен печат“, Брзакова исчезна на 18 јануари, а нејзиниот сопруг пријави дека не се вратила дома три дена подоцна. Марија заедно со сопругот и својата ќерка живееле во Швајцарија, а кога исчезна биле дојдени во Македонија.
Каде отишла младата мајка, засега никој не знае. Засега само се знае дека таа утрото кога излегла од својот дом, Марија била облечена во тренерки во темна боја, на нозете имала патики или влечки, со себе не носела ташна, мобилен или било каков документ. Висока е околу 160 сантиметри, средна градба, со долга костенлива коса. Исчезнувањето во полицијата го пријавил нејзиниот сопруг. Марија е по потекло од соседното село Турново. Таа е мајка на четиригодишна ќеркичка.
Ниту нејзиното семејство, ниту истражните органи не отркиваат повеќе детали за овој случај, освен дека се трага по Брзакова.
The post 20 дена по нејзиното исчезнување: Фотографија од Марија се најде на листата на МВР за исчезнати лица appeared first on Слободен печат.
