Денес разговараме со Мирко Ѓорѓиевски од село Режановце, кумановско. Селото е познато по двете археолошки наоѓалишта кои сведочат дека тука луѓе живееле уште од железно време. Мирко моментално не работи, а работел во чевларска индустрија во одделот за главна контрола за извоз. Инаку, тој е голем љубител на цвеќиња, сам си ги одгледува во дворот и се грижи за совршено оплеменување и изглед на ова парче земја.
– Цвеќето јас го одгледувам, правам распоред како да ги подредам цвеќињата, јас ги садам, ги размножувам, а некои ги купувам – ни објаснува Мирко.
Времето кое го посветува на дворот, за Мирко е задоволство.
– Кога работиш нешто со љубов не треба многу време – додава тој – Секој ден по нешто, и работата ќе се заврши.
Во дворот има најразлични видови цвеќиња, од сардели, бонбонки, до воденки, а сега и сурфинии…
– Во текот на зимата, едни цвеќиња ги внесувам во подрумот, други во ходник во куќата, па така преживуваат успешно – вели Мирко.
Омилено цвеќе нема, зашто сите му се омилени! Или како што вели, секое цвеќе си е убаво на свој начин.
Цвеќето е нешто најубаво и го одгледувам многу одамна. Задоволство ми е да седнам во двор и да се напиеме кафенце со моите, со соседи, роднини, пријатели – со задоволство вели Мирко.
Инаку, Мирко е член на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
УЖИВАЈТЕ ВО ФОТОГАЛЕРИЈАТА:
ФОТО – ПРИВАТНА АРХИВА
