Човечката раса е одговорна за климатските промени и глобалното затоплување, а тие неповратно влијаат на многу природни чуда. Се проценува дека 7 отсто се во „критична“ опасност, додека други 30 „сериозно ги загрижуваат“ научниците и истражувачите. А што точно би можело да исчезне, прочитајте во продолжение, пренесува „Time Out“.
Националниот парк Еверглејдс
Познатиот национален парк на Флорида би можел да биде целосно непрепознатлив до 2050 година. Моментално е во еден вид деликатна рамнотежа, каде што целата флора и фауна живее без проблеми, но зголемувањето на нивото на морето може да донесе сериозни промени. Зголемувањето на концентрацијата на солена вода би го нарушило живеалиштето и организмите кои живеат во неа – мангрови, орхидеи, алигатори и штркови.
Големиот корален гребен
Тажен факт е дека половина од Големиот корален гребен исчезна од 1985 година. Со глобалното затоплување, просечните температури на водата се зголемуваат, што доведува до избелување на коралите и зголемување на бројни инвазивни видови. Покрај тоа, невремето и другите екстремни временски настани ја уништуваат и оваа област во близина на Австралија. Затоа е многу важно да направиме сè што е во наша моќ за да го забавиме глобалното затоплување.
Викториините Водопади
За разлика од Еверглејдс, водопадите Викторија не се загрозени од вишокот вода, туку, напротив, од недостаток. Пред две години се случи сушата да предизвика драстично намалување на протокот на вода кај познатите водопади, а тоа беше само показател што би можело да се случи доколку продолжат екстремните климатски промени – тие целосно да пресушат.
Мртвото Море
Не само климатските промени се одговорни за потенцијалната опасност, туку вината е и на луѓето. Дури 95 отсто од реката Јордан, главниот извор на ова езеро, се пренасочува за да се користи во земјоделството и индустријата, а сето тоа е проследено со помалку дожд и поголемо испарување на водата предизвикано од зголемената температура. Како резултат на тоа, Мртвото Море би можело целосно да се исуши до 2050 година.
Дождовните шуми во Борнео
Уништувањето на шумите го влошува глобалното затоплување, а зголемените температури го уништуваат биодиверзитетот и го зголемуваат ризикот од пожари. Сето ова влијае на дождовните шуми во Борнео, кои се загрозени од неразумна сеча на дрвја, пожари и насади со нафта. Доколку температурата се зголеми за уште два степени, живеалиштата во овие шуми би можеле целосно да бидат уништени. Со оглед на тоа што тие содржат 6 отсто од биолошката разновидност во светот, ова е сериозен проблем.
