Јордан Митев искрено проговори за тешкиот период поради сериозно нарушеното здравје. Фолк-пејачот пред неколку години откри дека имал операција откако лекарите му нашле инвазивен планоцелуларен карцином.
Познатиот македонски фолк-пејач и кантавтор, проговори за професионалните предизвици и здравствената цена на долгогодишното градење на успешна кариера, во интервју за „Гламур ТВ“.
Митев се осврна на еден подолг и тежок период низ кој поминал, нагласувајќи дека таквите состојби не доаѓаат одеднаш, туку се таложат со текот на времето.
„Тоа беше еден доста тежок момент за мене, тежок период. Траеше подолго. Тоа не е нешто кое што се решава од денес за утре, а исто така и не е нешто кое што доаѓа од денес за утре. Тоа е резултат на многу работи коишто организмот најверојатно ги памети, па сето тоа бара простор и време кога ќе излезе“, вели Митев.
Според неговите зборови, темпото на работа кое го наметнува естрадата бара жртви кои публиката често не ги гледа. Тој признава дека неговиот најголем непријател бил стресот, кој го имало во огромни количини додека се трудел да ја заземе својата позиција на сцената.
„Најголемиот проблем на човекот, најголемата атомска бомба на еден човек е стресот. А кај мене го имаше во енормно големи количини, бидејќи да се гради оваа кариера верувајте дека не е така тоа баш наивно, знаете – земи го микрофонот и пеј. Сето тоа да се испорача, да се процесира и да трае човек, тоа бара многу сериозна, многу студиозна работа и сето тоа си има одреден данок којшто треба да се плати“, објаснува пејачот.
Тој додава дека неговата посветеност често значела и по неколку дена поминати во студио без излегување:
„Јас си го платив чесно данокот и бев свесен дека тоа ќе дојде, затоа што кај мене се случувало по три дена да не излезам од студио или да преспијам во студиото и одма да продолжам. Значи многу денови коишто навистина сум… па и месеци што се дадени, големи жртви… И сето тоа е – да не зборувам за настапите – значи сум имал јас по два настапи во денот каде што еден настап трае 4-5 часа, се пакувам, заминувам на друго место, на друго место пак 4-5 часа пеење. И тоа се повторувало со денови, со денови, со месеци… Но тоа е цената којшто мора да се плати во одреден период од животот за да човек се докаже и да заземе своја позиција“, заклучува Митев.
