Актерот Том Хенкс одлучи да го продаде неговиот „фиат 126п“, автомобил познат како „пегличка“, а целиот приход што ќе го собере ќе го донира во добротворни цели. Популарниот актер го добил овој олдтајмер како подарок во 2016 година.
Жителите на градот Биелско-Биале во Полска, поточно сограѓанката Моника Јасколска, за роденден му ја подарила нејзината „пегличка“. Автомобилот од 1974 година бил целосно реставриран и дотеран за актерот кој не можел да сокрие колку е возбуден и среќен.
-Едноставно прекрасен и преубав автомобил. Не сум сигурен колку километри ќе помине на патиштата во Калифорнија, ама се тешам што можам да го поправам со шрафцигер и женски каиш – изјави своевремено Хенкс и како благодарност донираше голема сума пари за болницата во која работела Јаколска.
So excited about my new car! Hanx pic.twitter.com/e5es8RoR1s
— Tom Hanks (@tomhanks) October 29, 2016
Во моментов неговата „пегличка“ е на аукцијата Бринг а Треилер, а највисоката понуда изнесува 57.000 долари. Таа цена е сигурно највисоката што некој би ја платил за овој олдтајмер.
Малата „пегличка“ однадвор е со бела боја, а внатрешноста е зелена со бели детали. Новиот сопственик со неа ќе добие и ракавици за возење, резервни свеќици и документи за сервис. Актерот дури и се потпишал на внатрешноста на вратата од страната на возачот.
Хенкс сака да го продаде својот автомобил за да собере пари за фондацијата на Елизабет Дол и нејзината кампања Hidden Heroes.
Фондацијата „Елизабет Дол“ е основана во 2012 година со цел подигнување на свеста на јавноста, поттикнување истражувања и соработки за поддршка на 5.5 милиони американски сопружници, родители, членови на семејства и пријатели што се грижат за ранети, болни или повредени американски ветерани.
