Општинскиот граѓански суд во Загреб донесе неправосилна пресуда во долгогодишниот спор за старателството над синот на хрватската пејачка Северина Вучковиќ и српскиот претприемач Милан Поповиќ. Нивниот син Александар отсега ќе живее со својата мајка, што го потврди и адвокатката на Северина во тој спор, Јасминка Билош.
Северина се огласи по пресудата со краток текст насловен „Благодарам, но не е готово“.
„Неизмерна благодарност до сите што ме опсипувате со поддршка овие денови… Всушност, мојот син веќе извесно време е дома , а сега тоа е и формално потврдено со оваа судска одлука“, напишала таа покрај фотографиите со својот син.
Од друга страна, борбата не е завршена… Ниту мојата, ниту на многу мајки. На пример, постојат две девојчиња кои осум години не смеат да го напуштат Загреб, а нивната мајка останува без средства да се бори против суровиот и студен систем, кој треба да ги стави децата на прво место, а не моќните родители. Не сум и никогаш нема да престанам да зборувам за тоа и да се борам за послабите“, додаде Северина.
