Ако сакате да вечерате со поранешниот американски претседател Доналд Трамп во еден од неговите голф-клубови ќе треба да платите неверојатни 100.000 долари. Можете да си ги донесете и пријателите, секако ако платите и за нив.
Покана добил и престижниот магазин Форбс и веднаш објави за неа на своите веб-страници. Треба да побрзате, да резервирате места, ќе има навала на 14 септември – во САД има многу луѓе кои се заинтересирани. Затоа што постои можност за ексклузивна слика со поранешниот – можеби иден – претседател. Кој би одолеал на таа покана?
Организаторите нудат уште една опција, со доплата, да се одигра партија голф со Трамп.
Познато е дека Трамп помина голем дел од својот претседателски мандат на терените за голф. Најмногу од сите претседатели. Токму тој го критикуваше Барак Обама дека играл премногу голф додека бил претседател. Во поканата не пишува колку треба да платите за тоа задоволство.
Парите одат во PAC (политички акционен комитет, тело кое собира средства за кампањата) со име што лесно се помни Make America Great Again, Again!. Пократко, MAGA, Повторно! – „Да ја направиме Америка повторно голема, повторно“.
