Поранешниот американски претседател Доналд Трамп ја критикуваше пејачката од Барбадос Ријана пред нејзиниот настап на Супер Боул, пренесува Индипендент.
Во ноќта кон понеделник, 13 февруари, ќе се одигра 57-от финален натпревар во сезоната на Националната фудбалска лига во американски фудбал. Ријана ќе пее за време на полувремето на Супер Боул, нејзин прв настап по пет години.
Триумфалното враќање на пејачката од Барбадос на сцената го очекуваат многумина, со исклучок на Доналд Трамп.
„Без нејзиниот „стилист“, таа би била НИШТО. Сè е лошо, и НЕМА ТАЛЕНТ!“ – поранешниот американски претседател се налути и бесот го истури на сопствената социјална мрежа Truth Social.
Кога Доналд Трамп беше актуелен претседател, Ријана го нападна со остри критики. Во 2017 година, пејачката го нарече тогашниот американски лидер „неморална свиња“ поради заострувањето на имиграциската политика. Во 2019 година, таа беше огорчена од неговата реакција на масовните пукања во неколку држави.
„Замислете свет во кој купувањето АК-47 е полесно отколку добивањето виза. Замислете свет во кој американските власти градат ѕид за да ги задржат терористите во Америка “, беше огорчена таа раскажувајќи го тоа на социјалните мрежи.
За време на еден од политичките собири во 2018 година, Доналд Трамп ја искористи песната на Ријана „Don’t Stop the Music“ – потоа адвокатите на пејачката му се заканија со соодветно писмо.
