Хрватскиот пејач Јаков Јозиновиќ доби посебно изненадување на концертот во Ниш. Уметницата Андреа Петровска, која потекнува од Скопје, му подари слика на платно во која ги спои неговиот роден град и мотивите од неговите песни.
На делото е прикажан Јаков во Винковци, со детали што упатуваат на песните „Полје ружа“ и „4 ласте“. Внимателно избраните мотиви го направија подарокот особено личен за пејачот, чија реакција е забележана на видео што Андреа го сподели на Инстаграм.
Јозиновиќ не го криеше изненадувањето додека ја разгледуваше сликата. Кога дозна дека уметницата е од Македонија, ѝ возврати со зборови што го одбележаа нивниот разговор:
„Ах Македонци, ако ве немаше, ќе требаше да ве измислиме“.
Пејачот кажа и дека сликата ќе добие место во неговиот стан, покажувајќи колку му значи гестот на Андреа.
