Започнавме убава соработка со една врвна готвачка која секое јадење го претвара во магија од вкусови – Теодора Георгиевска.
Оваа извонредна мајсторка и една од највлијателните готвачки на социјалните мрежи кај нас, стои зад бројните рецепти кои ги објавува на профилот „Готвиме со Теа“ – „gotvime.so.tea“.
Теа денес ни подготви супер здрав и едноставен оброк – печен лосос во комбинација со зеленчук.
„Рибата треба да биде вклучена во нашите оброци еднаш до два пати неделно. Овој пат одбрав лосос, бидејќи е богат со омега 3 масни киселини и квалитетни протеини“, вели Теа.
Потребни состојки за две лица:
- 2 парчиња лосос (500-600 гр)
- 2 компири
- 2 моркови
- 1 благ компир
- 1 лимон
- сол и црн бибер
- рузмарин
- 2-3 чешниња лук
- масло за јадење
View this post on Instagram
(@gotvime.so.tea)Начин на подготовка:
Рибата посолете ја, исцедете го врз неа лимонот и додадете ги рузмаринот и лукот исецкан на ситни парчиња. Во тавче на мрсна хартија ставете ги спремените парчиња лосос, а околу нив ставете ги компирот, морковот и благиот компир претходно исецкани на коцки и зачинети со сол и бибер. Ставете од маслото за јадење врз лососот и врз зеленчукот, покријте го тавчето со фолија и ставете го да се пече во загреана рерна на 250 степени 30 минути, а потоа извадете ја фолијата и печете уште 10 минути. На здравје и уживајте во овој прекрасен и здрав оброк.
