Анѓела Игњатовиќ позната како Бресквица и нејзиниот поранешен партнер Немања Станисављевиќ со години важеа за еден од најскладните млади парови на српската сцена. Нивната љубовна приказна траеше дури пет години, а за време на врската не криеја дека прават големи планови за заедничката иднина.
Нивната врска заврши, а од заедничките планови денес останаа само спомени, но и една исклучително луксузна недвижност која своевремено ја подготвувале како свое љубовно гнездо, пишува „Курир“.
Вила во Мељак вредна 830.000 евра
Станува збор за раскошна вила во Мељак, во близина на Белград, која сега се најде во огласите за продажба на недвижности по цена од дури 830.000 евра. Дека во овој објект се вложени многу пари, време и внимание, најдобро покажуваат неговиот изглед и богатата содржина.
Вилата се простира на околу 200 квадратни метри, а се наоѓа на возвишение, во мирен дел од Мељак, што на новите сопственици им нуди прекрасен поглед кон природата и висок степен на приватност.
Немања, како што пренесуваат медиумите, се труди недвижноста што побрзо да се продаде, па огласот за вилата неретко го споделува и преку својот профил на Инстаграм.
Најсовремено обезбедување и луксузен минимализам
Ова не е обична куќа, туку вистински луксузен проект замислен како спој на модерен минимализам, луксуз и најнова технологија. Посебно внимание е посветено на безбедноста, па објектот е опремен со алармен систем, интерфон и видеонадзор кој практично го покрива секој дел од имотот, додека во внатрешноста се поставени и сензори за движење и чад.
Гардеробер како луксузен бутик
Еден од најатрактивните делови од куќата секако е пространиот „walk-in“ гардеробер, кој повеќе потсетува на луксузен бутик отколку на класична просторија за облека. Тоа била желба на пејачката уште од моментот кога одлучиле заедно да го градат својот дом.
Вградените плакари имаат стаклени фронтови, златни профили и интегрирано ЛЕД-осветлување, додека во централниот дел се наоѓа посебен остров со стаклена површина наменета за аксесоари. Сето тоа дополнително го надополнува голем кристален лустер.
Дневната соба исто така е уредена во модерен, луксузен стил. Особено внимание привлекува спуштената зона за седење, која на просторот му дава сосема поинаква атмосфера. Тука се наоѓа и вграден линеарен камин, како и декоративни дрвени ѕидни панели.
Кујна по мерка и приватен спа-центар
Кујната е изработена по мерка, во комбинација од природно дрво и мат антрацит, а централно место зазема голем монолитен остров со изглед на темен бетон. Ѕидните облоги со дезен на црн мермер и модерната вградена техника дополнително го нагласуваат луксузниот карактер на овој простор.
Ниту бањата не заостанува зад остатокот од вилата, бидејќи е замислена како приватен спа-центар. Ја красат мијалник од природно обработен камен, елегантни златни, односно месингани детали, големо тркалезно ЛЕД-огледало и темни мермерни плочки.
Ѕид од природна карпа и професионална теретана
Посебно е уредена и главната спална соба, со вграден мебел во мат црна боја, ѕид кој ја имитира текстурата на природна карпа и голем прозорски отвор со автоматски ролетни кои овозможуваат целосно затемнување на просторијата.
Со оглед на тоа што поранешните партнери воделе сметка за својот изглед, во вилата изградиле и приватен фитнес-простор. Теретаната е професионално опремена со справи, има големи прозорски отвори за вентилација, како и специјално поставен гумен под.
Каскадна градина со базен и посебен простор за миленици
Сепак, еден од најголемите потенцијали на недвижноста се наоѓа надвор. Дворот е проектиран каскадно, со долги пристапни патеки, а тука има и огромен базен кој сè уште не е целосно завршен, но целиот потребен материјал веќе се наоѓа на плацот. Предвидена е и плажа.
Плацот е ограден со висок и цврст ѕид, што на сопствениците им овозможува целосна приватност, далеку од градската гужва и погледите на соседите.
Познато е дека Бресквица е голем љубител на животните, па дури и за домашните миленици е предвиден посебен, професионално ограден и уреден простор. На имотот се наоѓа и голема интегрирана гаража со челична кровна конструкција.
Приватната оаза го чека новиот сопственик
Иако требало да биде место каде што Бресквица и Немања ќе го градат својот заеднички живот, денес оваа луксузна вила претставува своевиден остаток од едно завршено поглавје.
Сега, наместо заеднички живот, луксузната куќа го чека својот нов сопственик, а вртоглавата цена од 830.000 евра јасно покажува дека не станува збор за обична недвижност.
