За Денот на независноста на Црна Гора пееше Рики Мартин, а за време на настапот на светската музичка ѕвезда се случи инцидент кога во публиката беше фрлен солзавец.
Тој сега првпат се огласи на Инстаграм и истакна дека сѐ уште е под импресии.
„Црна Горо, ќе изберам да се сеќавам само на неверојатната енергија што ја почувствував од сите вас. Публика толку топла и полна со љубов. Заедно ја славевме музиката, културата и, секако, вашата независност. Сѐ уште сум под импресии од таа неверојатна вечер настапувајќи за вас. Ви благодарам многу за поканата, ви испраќам многу љубов и сигурно ќе се вратам – напиша Рики Мартин на социјалната мрежа.
Црногорската полиција трага по лицето кое фрлило солзавец на концертот на латиноѕвездата на централниот плоштад во Подгорица по повод Денот на независноста. Солзавецот предизвикал паника меѓу граѓаните и концертот накратко бил прекинат, но набрзо продолжил.
Инцидентот предизвика големо разочарување и вистинска бура на социјалните мрежи. Наместо вечерта да помине исклучиво во знакот на музиката и славењето, овој неочекуван настан предизвика шок кај присутните, а на интернет набрзо почнаа да се редат коментари од огорчени граѓани кои не го криеја незадоволството и срамот поради ваквото однесување.
