Фестивалот на забавни мелодии „Макфест“ вчера ја одржа првата предфестивалска прес-конференција во хотел „Хилтон“ во Скопје.
На настанот беа претставени сите детали и поединости околу одржувањето на годинашното издание на фестивалот, како и целосните листи со изведувачи на двете фестивалски вечери, правилата и сѐ останато што ќе се случува годинава на најреномиранот македонски фестивал на забавна музика.
Уметничкиот директор на фестивалот, композиторот Роберт Саздов потенцираше дека годинашното издание на „Макфест“ има потенцијал да изроди повеќе хитови отколку една Евровизија. Исто така, тој сподели дека песните се модерни, современи, певливли и дека бргу ќе допрат до публиката.
Главниот кординатор на „Макфест“, Александар Арсовски говореше за техничко-организационите детали на годинашниот „Макфест“, кој со помош од средствата од општината, помагателите и спонзорите ќе добие една сосема нова компонента како во содржинскиот, така и во техничко-визуелниот квалитет и понуда.
Како што веќе беше најавено, по повеќе од три децении, на макфестовската сцена се враќа и еден од најпопуларните македонски пејачи – Владо Јаневски. За време на прес-конференцијата, тој направи емотивен осврт и носталгична прошетка по спомените од фестивалските години, потсетувајќи ги новинарите дека на сцената на домот на културата во Штип е уште од првиот „Макфест“. Тогаш како клавијатурист на групата „Бон-тон“, со нивната тогашна песна „Старо купувам“, за подоцна и самиот да биде дел од ѕвездените учесници со неговите „Еден бакнеж“ и „Чаирска романтика“, а сега со неговата нова фестивалска тема во најава „Златни години“. Исто така, Јаневски говореше за значењето и улогата на „Макфест“ за Штип и за Македонија, но и за младите имиња кои допрва доаѓаат на естрадната сцена.
Членот на уметничкиот совет Јован Јованов, кој за оваа цел допатува директно од Канада, каде последниве години живее и работи, зборуваше за сценскиот изглед на годинешното фестивалско издание, како и за целокупниот визуелен дизајн, но и за застапеноста на современите форми на презентација на фестивалот и неговите содржини преку постојните интернет-платформи и социјалните медиуми.
Пред бројните претставници на медиумите и дел од пејачите кои беа присутни низ посебна видеопрезентација на видеобимот беа претставени сите учесници. По 13 во секоја од двете фестивалски вечери, со визуелна најава на изведувачот, името на песната и аудио на рефренот од истата, која ќе ја изведува.
Споменатите протагонисти на крајот одговараа на прашањата од новинарите, а целата прес-конференција ја модерираше официјалниот пи-ар на „Макфест“, новинарот и водител Антонио Димитриевски.
Тој, меѓу другото, појасни дека и двете фестивалски вечери на „Макфест“ ќе бидат директно пренесувани на националниот сервис, на првиот канал на Македонската радио-телевизија, но и на првата програма на Македонското радио.
